Правилник за работата на Библиотеката на Правниот факултет
БИБЛИОТЕКА НА ПРАВНИОТ ФАКУЛТЕТ
ДОКУМЕНТ ЗА ПОЛИТИКИ: СВЕСНОСТ НА СТУДЕНТИТЕ ЗА УПРАВУВАЊЕ СО ОТПАД, ИНДУСТРИСКА СИМБИОЗА И ЗЕЛЕН УРБАН РАЗВОЈ
Правниот факултет „Јустинијан Први“ – Скопје го објавува документот за политики „Резултати и препораки за зголемување на свесноста на студентите за управување со отпад, индустриска симбиоза и зелен урбан развој“, изработен во рамките на COST акцијата CA22110 – LIAISE (Cooperation, Development and Cross-border Transfer of Industrial Symbiosis).
Документот ги презентира резултатите од анкетно истражување спроведено меѓу 167 студенти од Универзитетот „Св. Кирил и Методиј“ во Скопје во академската 2025/2026 година. Истражувањето ги анализира нивните ставови, ниво на информираност и подготвеност за вклучување во политики поврзани со управување со отпад, индустриска симбиоза и зелен урбан развој.
Клучните наоди укажуваат на висока свесност за значењето на рециклирањето, силна поддршка за инвестиции во управувањето со отпад и јасно препознавање на важноста од зеленото урбано планирање. Истовремено, документот идентификува ниска доверба во јавните институции и потреба од поголема едукација за индустриската симбиоза и климатската писменост.
Во документот се предложени пет групи препораки насочени кон:
-
подобрување на инфраструктурата за управување со отпад,
-
интегриран пристап кон одржлив урбан развој,
-
воспоставување механизми за партиципативно планирање,
-
јакнење на климатската писменост преку образовниот систем,
-
зголемување на довербата во јавните институции преку транспарентност и отчетност.
Документот е резултат на краткорочната научна мисија на проф. д-р Катерина Шапкова Коцевска, реализирана на Економскиот факултет при Универзитетот во Тирана (Албанија) во февруари 2026 година.
Целиот документ е достапен за преземање на следниот линк.